ಶಿವಮೊಗ್ಗ ವಿಮಾನ ನಿಲ್ದಾಣದಲ್ಲಿ ‘ಆಂಟಿ ಹೈಜಾಕ್’ ಅಣಕು ಪ್ರದರ್ಶನ: ಡಿಸಿ, ಎಸ್ಪಿ ನೇತೃತ್ವದಲ್ಲಿ ಉನ್ನತ ಮಟ್ಟದ ಸಮಿತಿ ಸಭೆ

ಶಿವಮೊಗ್ಗ(www.thenewzmirror.com): ಶಿವಮೊಗ್ಗ ಸೋಗಾನೆಯ ರಾಷ್ಟ್ರಕವಿ ಕುವೆಂಪು ವಿಮಾನ ನಿಲ್ದಾಣದ ಭದ್ರತೆ, ಪರಿಸರ ನಿರ್ವಹಣೆ ಹಾಗೂ ತುರ್ತು ಪರಿಸ್ಥಿತಿಗಳನ್ನು ಸಮರ್ಥವಾಗಿ ಎದುರಿಸುವ ನಿಟ್ಟಿನಲ್ಲಿ ಜಿಲ್ಲಾಡಳಿತ ಮತ್ತು ಪೊಲೀಸ್ ಇಲಾಖೆಯ ನೇತೃತ್ವದಲ್ಲಿ ಜಂಟಿ ಕಾರ್ಯಾಚರಣೆ ಹಾಗೂ ಮಹತ್ವದ ಸಭೆ ಜರುಗಿತು.

ವಿಮಾನ ನಿಲ್ದಾಣದ ಆವರಣದಲ್ಲಿ 2026ನೇ ಸಾಲಿನ ‘ಏರೋಡ್ರೋಮ್ ಎನ್ವಿರಾನ್ಮೆಂಟ್ ಮ್ಯಾನೇಜ್ಮೆಂಟ್ ಕಮಿಟಿ’ (AEMC) ಸಭೆ ಹಾಗೂ ‘ಆಂಟಿ ಹೈಜಾಕ್ ಮಾಕ್ ಎಕ್ಸರ್ಸೈಸ್’ (AHME – ವಿಮಾನ ಅಪಹರಣ ತಡೆ ಅಣಕು ಜಾಗೃತಿ ಅಭ್ಯಾಸ) ಹಮ್ಮಿಕೊಳ್ಳಲಾಗಿತ್ತು. ಜಿಲ್ಲಾಧಿಕಾರಿಗಳು ಹಾಗೂ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿಗಳು (ಎಸ್ಪಿ) ಜಂಟಿಯಾಗಿ ಈ ಕಾರ್ಯಕ್ರಮದಲ್ಲಿ ಭಾಗವಹಿಸಿ ಪರಿಶೀಲನೆ ನಡೆಸಿದರು.

ವಿಮಾನ ಅಪಹರಣ ತಡೆ ತಾಲೀಮು:

ವಿಮಾನ ನಿಲ್ದಾಣದ ಭದ್ರತೆಗೆ ಸವಾಲಾಗುವಂತಹ ಯಾವುದೇ ವಿಮಾನ ಅಪಹರಣ (Hijack) ಅಥವಾ ಉಗ್ರಗಾಮಿ ದಾಳಿಯಂತಹ ತುರ್ತು ಸಂದರ್ಭ ಎದುರಾದರೆ, ರಕ್ಷಣಾ ಪಡೆಗಳು ಮತ್ತು ಆಡಳಿತ ಯಂತ್ರ ಹೇಗೆ ಕಾರ್ಯಪ್ರವೃತ್ತರಾಗಬೇಕು ಎಂಬುದನ್ನು ಪ್ರಾಯೋಗಿಕವಾಗಿ ಪ್ರದರ್ಶಿಸಲಾಯಿತು. ಭದ್ರತಾ ಸಿಬ್ಬಂದಿ, ಕಮಾಂಡೋಗಳು ಹಾಗೂ ಪೊಲೀಸ್ ತಂಡಗಳು ಜಂಟಿಯಾಗಿ ನಡೆಸಿದ ಈ ತಾಲೀಮು ಅತ್ಯಂತ ಯಶಸ್ವಿಯಾಗಿ ಮೂಡಿಬಂದಿತು.

ಪರಿಸರ ಮತ್ತು ರಕ್ಷಣಾ ಸಭೆ:

ಇದಕ್ಕೂ ಮುನ್ನ ನಡೆದ ಎಇಎಂಸಿ (AEMC) ಸಭೆಯಲ್ಲಿ, ವಿಮಾನ ನಿಲ್ದಾಣದ ಸುತ್ತಮುತ್ತಲಿನ ಪರಿಸರ ಸ್ವಚ್ಛತೆ, ಪಕ್ಷಿಗಳ ಹಾವಳಿ ತಡೆಗಟ್ಟುವಿಕೆ ಹಾಗೂ ರನ್‌ವೇ ಸುರಕ್ಷತೆಗೆ ಕೈಗೊಳ್ಳಬೇಕಾದ ಕಟ್ಟುನಿಟ್ಟಿನ ಕ್ರಮಗಳ ಕುರಿತು ವಿಸ್ತೃತ ಚರ್ಚೆ ನಡೆಸಲಾಯಿತು. ವಿಮಾನಗಳ ಸುರಕ್ಷಿತ ಹಾರಾಟಕ್ಕೆ ಯಾವುದೇ ಅಡ್ಡಿಯಾಗದಂತೆ ನಿರಂತರ ನಿಗಾ ವಹಿಸಲು ಅಧಿಕಾರಿಗಳಿಗೆ ನಿರ್ದೇಶನ ನೀಡಲಾಯಿತು. ಸಭೆಯಲ್ಲಿ ವಿಮಾನ ನಿಲ್ದಾಣದ ಉನ್ನತ ಅಧಿಕಾರಿಗಳು ಹಾಗೂ ವಿವಿಧ ಇಲಾಖೆಗಳ ಮುಖ್ಯಸ್ಥರು ಉಪಸ್ಥಿತರಿದ್ದರು.

ಶಿವಮೊಗ್ಗ ನೆಹರೂ ಕ್ರೀಡಾಂಗಣದಲ್ಲಿ ಯಶಸ್ವಿ ‘ಮಾಕ್ ಡ್ರಿಲ್’:

ಯಾವುದೇ ಆಕಸ್ಮಿಕ ವಿಪತ್ತು ಅಥವಾ ತುರ್ತು ಪರಿಸ್ಥಿತಿಗಳು ಎದುರಾದಾಗ ನಾಗರಿಕರನ್ನು ರಕ್ಷಿಸಲು ಹಾಗೂ ಆಡಳಿತ ಯಂತ್ರವನ್ನು ಸಜ್ಜುಗೊಳಿಸುವ ನಿಟ್ಟಿನಲ್ಲಿ ಶಿವಮೊಗ್ಗ ನಗರದಲ್ಲಿ ಬೃಹತ್ ಅಣಕು ಅಭ್ಯಾಸ (ಮಾಕ್ ಡ್ರಿಲ್) ಹಮ್ಮಿಕೊಳ್ಳಲಾಗಿತ್ತು.

ನಾಗರಿಕ ರಕ್ಷಣಾ ವಿಭಾಗದ ವತಿಯಿಂದ ಆಯೋಜಿಸಲಾಗಿದ್ದ ವಾಯುದಾಳಿ (ಏರ್ ರೈಡ್) ಮತ್ತು ಕತ್ತಲೆ ನಿಯಂತ್ರಣ (ಬ್ಲ್ಯಾಕ್‌ ಔಟ್) ಕಾರ್ಯಾಚರಣೆಯ ತರಬೇತಿ ಪ್ರದರ್ಶನವು ಯಶಸ್ವಿಯಾಗಿ ಜರುಗಿತು.ನೆಹರೂ ಕ್ರೀಡಾಂಗಣದಲ್ಲಿ ಈ ವಿಶೇಷ ಕಾರ್ಯಾಚರಣೆಯನ್ನು ಹಮ್ಮಿಕೊಳ್ಳಲಾಗಿತ್ತು.

ರಕ್ಷಣಾ ತಂತ್ರಗಳ ಪ್ರದರ್ಶನ:

ಆಕಸ್ಮಿಕವಾಗಿ ವೈಮಾನಿಕ ದಾಳಿ ಅಥವಾ ಯುದ್ಧದಂತಹ ತುರ್ತು ಸಂದರ್ಭಗಳು ಎದುರಾದಾಗ ನಾಗರಿಕರು ಕೈಗೊಳ್ಳಬೇಕಾದ ಸುರಕ್ಷತಾ ಕ್ರಮಗಳ ಬಗ್ಗೆ ಇಲ್ಲಿ ಪ್ರಾಯೋಗಿಕವಾಗಿ ತರಬೇತಿ ನೀಡಲಾಯಿತು. ದಾಳಿಯ ಸಮಯದಲ್ಲಿ ನಗರದಲ್ಲಿ ಸಂಪೂರ್ಣ ಕತ್ತಲೆ ಆವರಿಸುವಂತೆ ಮಾಡುವ ‘ಬ್ಲ್ಯಾಕ್‌ ಔಟ್’ ಪ್ರಕ್ರಿಯೆ, ಗಾಯಾಳುಗಳನ್ನು ಪ್ರಥಮ ಚಿಕಿತ್ಸೆ ನೀಡಿ ಸುರಕ್ಷಿತವಾಗಿ ಆಸ್ಪತ್ರೆಗೆ ರವಾನಿಸುವ ವಿಧಾನ ಸೇರಿದಂತೆ ವಿಪತ್ತು ನಿರ್ವಹಣೆಯ ಪ್ರಮುಖ ರಕ್ಷಣಾ ತಂತ್ರಗಳನ್ನು ಸಿಬ್ಬಂದಿ ಯಶಸ್ವಿಯಾಗಿ ಪ್ರದರ್ಶಿಸಿದರು.

ಸುರಕ್ಷತಾ ಇಲಾಖೆಗಳು, ಗೃಹರಕ್ಷಕ ದಳ ಹಾಗೂ ವೈದ್ಯಕೀಯ ತಂಡಗಳ ಜಂಟಿ ಸಮನ್ವಯತೆಯೊಂದಿಗೆ ನಡೆದ ಈ ತಾಲೀಮು ಸಾರ್ವಜನಿಕರಲ್ಲಿ ರಕ್ಷಣಾ ಕ್ರಮಗಳ ಕುರಿತು ಜಾಗೃತಿ ಮೂಡಿಸುವಲ್ಲಿ ಸಹಕಾರಿಯಾಯಿತು.